Bibbo-Cit daog vs. PTT fuels-UV

CEBU, Philippines - Ang dili kaayo ilado nga sophomore player nga si John Francis Abad mi-iskor og krusyal kaayong follow-up gikan sa iyang offensive rebound bisan pa sa depensa gikan ni Gerald Legarde nga maoy nagbaswat sa Bibbo-CIT Wildkittens ngadto sa kulba-hinam kaayo nga 77-76 upset batok sa mas paboritong PTT Fuels-UV Baby Lancers alang sa labing una nilang daog sa nagpadayong CESAFI Partners’ Cup didto sa Cebu Coliseum.

Sa laing duwa, ang mas lig-on nga Enervon C-UC Junior Webmasters mimakmak sa wala'y daug-daog nga Prime Asia-DBTC Baby Greywolves, 112-83 aron pag-inat sa ilang winning streak ngadto sa upat ka daog ug wala pay pilde.

Ang Baby Lancers naglabaw pa unta og usa ka punto, 76-75 sa daginutong oras apan sila ra sab ang mabasol tungod kay miluag ang ilang depensa aron unta maoy modaog.

Mao lang usab kadto’y basket nga nahimo ni Abad ug wala damha nga ang iyang amot nga dos puntos maoy nahimong pinadako sa duwa mas labaw pa sa 14 puntos nga nahimo ni Wilkin Sanchez kinsa maoy nangu sa Wildkittens.

Sila si John Merlow Gerra ug Clivvin Limalima midugang og 11 ug 10 puntos matag usa alang sa Wildkittens kinsa naghupot na karon og 1-2 nga baraha.

Sila si Legarde ug Kevin Clark Marata parehong mi-iskor og 12 puntos aron pangulohan ang Baby Lancers kinsa naghupot na og 2-2 nga baraha.

Sa laing bahin, si Jeri Marion Pingoy maoy nangu sa laing tulo ka scorers nga mihimo’g double figures aron pangulohan ang Junior Webmasters sa iyang 14 puntos.

Ang Baby Greywolves gipangulohan ni Lourence Ruiz kinsa mihakot og 11 puntos ug si Jose Marlo Pono midugang og 10 puntos.

Sa collegiate match, nasakmit sa Ave Maria Sanctuary Park-USJR Jaguars ang ilang ika-upat nga sunod-sunod nga kadaogan sa collegiate division pinaagi sa pagpugong kang June Mar Fajardo ngadto lang sa sayis puntos ug gipukan ang Enervon C-UC Webmasters, 63-59 kaniadtong Sabado.

Sa laing duwa, si Sam Hermosa mi-iskor og five-point blitz sa nagka-upos nga oras lakip ang usa ka triple ug usa ka lay-up nga maoy nagbaswat sa San Marino Corned Tuna-USC Warriors ngadto sa 69-68 nga kadaugan batok sa Bibbo-CIT Wildcats.

Tungod sa iyang nahimo, si Hermosa maoy napiling best player ug samtang naglakaw siya aron ma-interview sa TV crew, iyang gitawag ang iyang hinigugma nga si Sharon Angel, ang Miss CESAFI aron mohatag og moral support. - Gabby G. Malagar (BANAT NEWS)