ANS-Pomeroy hari gihapon

CEBU, Philippines - Napanalipdan sa Abellana National School (ANS)-Pomeroy ang ilang korona sa boys 19 division sa 7th Thirsty Cup football tournament kagahapon didto sa Cebu City Sports Center Oval.

Ang ANS ug Don Bosco Alumni Football Club-A nagtabla sa unang dapit sa managsamang 4-1 win-loss records, apan ang ANS maoy nakaangkon sa korona tungod sa ilang 10-9 nga kadaugan batok sa Bosconians.

Si ANS coach Francis Ramirez mitug-an nga dili sayon ang ilang giagian aron makuha ang ikaduha nilang titulo.

Sunod hataga'g pagtagad sa ANS-Pomeroy mao ang pagsakmit sa ilang ikaduhang titulo sa boys 17 nga gihugpaan usab sa mga tang-ang koponan.

 Sa boys 12 category, ang Pomeroy Football Club nga gilangkuban sa mga magduduwa gikan sa Cebu City Central School (CCCS) mipukan sa Sacred Heart School-Jesuit (SHS-J) pinaagi sa penalty shootout, 2-1, alang sa kampiyonato.

Ang M. Lhuillier-Canduman   miharos sa upat nila ka duwa aron dominaron ang boys-6 division.

Sa pikas bahin, nakuha sa University of San Carlos ang titulo sa girls19 division ug ang Atletica de Cebu maoy mipahiluna sa ikaduhang dapit.

Ang bisitang koponan gikan sa San Carlos City miuli bitbit ang korona sa girls 12 category pinaagi sa ilang 4-0 nga baraha, ang Subangdaku Football Club mi-okupar sa ikaduha bitbit ang   3-0-1 nga baraha.    (BANATNEWS)