Danao andam na sa CVIRAA Regional meet

CEBU, Philippines - Giisip nga usa ka dakung hagit sa siyudad sa Danao ang pag-host sa Central Visayas Regional Athletic Association (CVIRAA) Regional meet karong Pebrero 8-14.

 Sa press conference kagahapon didto sa Pino! Restaurant sa Lahug, si Danao City Sports Commission chairman ug City Councilor Oscar 'Boying' Rodriguez, Jr. nagkanayon nga daku nilang garbo ang pag-host sa CVIRAA ug misaad sila nga buhaton nila ang tanan aron mamahimong mabulukon ug malampuson ang ilang pagpahigayon sa CVIRAA ning tuiga.

Alang sa seguridad sa mga 9,000 ka mga atleta nga naggikan sa nagkadaiyang dapit sa region 7, gipasalig ni Rodriguez nga pahugtan pa nila ang seguridad diin nakigtambayayong sila sa kapolisan ug sa mga barangay tanod sa Danao.

Si DepEd Regional Director Recaredo Borgonia nagkanayon nga paninguhaon nila nga mamahimong hapsay ang dagan sa torneyo. Gipasidan-an usab ni Borgonia ang mga nagplanong manikas tungod kay aduna sila'y giandam nga bug-at nga silot alang sa mga masakpan.

Gipahibalo usab ni Borgonia nga sa labing unang higayon sa kasaysayan sa CVIRAA, ang DepEd-VII mogamit na og mga high-tech nga kahimanan aron mapadali ang pagpadala sa resulta ngadto sa mga team ug sa mga media.

Usa ka website sa CVIRAA ang ilakip sa DepEd-VII homepage diin makakita sa resulta sa matag event.

Tanang duwa gawas sa elementary tennis ug swimming adto ipahigayon sa Danao City. Ang elementary tennis duwaon didto sa Liloan, samtang ang swimming anha sa Cebu City Sports Center.   (BANATNEWS)