CEBU, Philippines - Ang Ave Maria Sanctuary Park-USJR Jaguars tinguha sa solong liderato apan mosubay kini og tungason nga dalan kay ang ilang sangkaon mao man ang Enervon C-UC Webmasters sa main game sa pagpadayon sa CESAFI Partner’s Cup karong adlawa didto sa Cebu Coliseum.
MGA DUWA KARON
(Cebu Coliseum)
JUNIORS
1:00 pm -- San Marino-USC vs. Bibbo-CIT
2:30 pm -- Ave Maria-USJR vs. Enervon C-UC
SENIORS
4:00 pm -- San Marino-USC vs. Bibbo-CIT
5:30 pm -- Ave Maria-USJR vs. Enervon C-UC
Magsangka ang duha sa alas-5:30 sa hapon.
Ang Jaguars magsalig karon sa serbisyo sa ilang kanhi magduduwa nga sila si Jabe Delfino, Armand Ponce ug Mannie Gabas aron maoy mobabag nilang June Mar Fajardo, Moncrief Rogado ug sa mibalik nga si Edward Pao.
Si Pao wala makaduwa sa miaging CESAFI season tungod sa academic deficiency, apan ang Webmasters mi-abante gihapon sa finals apan wala lang sila makasustenir batok sa powerhouse University of the Visayas (UV) Green Lancers.
Uban ni 6-foot-9 Fajardo, kinsa mipakita og maayong kalamboan sa duwa, ang Webmasters dili kaayo mahasol kun si kinsay ilang idugang sa ilang line-up tungod kay bisan og dili na sila magkuha og mga alumni, makasustiner gihapon sila batok sa ilang mga kaatbang.
Sa laing collegiate match, ang San Marino-USC Warriors nga mipukan sa mas lig-on nga PTT Fuels-UV Lancers, 78-74 niadtong Domingo, mosuway pagkulit sa ilang ikaduhang daog diin ilang sangkaon ang Bibbo-CIT Wildcats.
Sa secondary matches, ang 2-0 Baby Jaguars nagtinguha sab pagkulit sa ilang ikatulong daog sa dihang ilang harungon ang Junior Webmasters, samtang ang Baby Warriors makigbatok sa Cebu Institute of Technology (CIT) nga pulos uhaw og daog. (BANATNEWS)