Roble Shipping Abante sa finals

CEBU, Philippines - Miabante na sab ngadto sa finals ang Roble Shipping nga pinangulohan sa ilang team captain George Uy human ilang gipukan ang Powerball, 93-79   sa   Invitational Friendship Cup season 2 basketball tournament diha sa CEC gym sa dalan Dimasalang, ning dakbayan.

Sa sayo pa, ang Benitez Dental Clinic midaog batok sa Tantan sa iskor nga 58-47 aron pagsakmit og luna sa playoff batok sa Powerball sunod semana, diin ang modaog maoy moharong sa defending champion Roble Shipping alang sa kampiyonato.

Sila si Dave Lim ug Uy maoy mitimon sa Roble Shipping pagsugod aron pagposte og 11 puntos sa first quarter, 24-13. Sila si Carpio, Dindo Sausa ug Ruel Sestoso misuporta sab sa opensiba aron palapdan pa ang ilang labaw

Mihulga unta ang Powerball sa fourth period, 60-65 pinaagi sa pagpatuman sa hugot nga depensa nilang Saimon Canete ug Emy Gaviola, apan gisanta sa Roble Shipping ang maong rally pinaagi sa 28-18 run aron paglansang og 14- puntos nga kadaugan.

Sila si Lim ug Carpio maoy nangulo sa Roble Shipping nga miposa og 15 puntos matag usa ug laing upat ang miamot og double figures.

Ang Powerball gipangulohan nilang Bondying Mendoza ug Lando Luces nga nagkumboya og 35 puntos.

Sa laing bahin, si Cardo Saranania maoy nangulo sa Benitez Dental Clinic pinaagi sa iyang 14 puntos, gisundan ni playing coach Jongkoy Napisa nga adunay 13 puntos.

Puntos Matag Usa

Unang duwa:

Benitez (58) - Saranania 14, Napisa 13, Pulgo 8, Bentain 7, Bensi 4, E. Benitez 2, Vilo 2, Amodia 2, P. Benitez 2, R. Benitez 2, Paquibot 2

Tantan (47) - Abano 11, Abejo 10, Garcia 10, Go 6, Compuesto 5, Nomio 2, Patalinghug 2, Polancos 1

Ikaduhang duwa:

Roble Shipping (93) - D. Lim 15, Carpio 15, Sausa 14, T. Lim 12, Sestoso 11, Uy 10, Gabutan 8, Armenion 4, Encallado 4

Powerball (79) - Mendoza 18, Luces 17, Gaviola 15, Canete 13, Fuentes 8, Estorba 4, Caruana 4. – BANAT NEWS