CEBU, Philippines - Mag-abot na usab ang mga banggiitang riders sa Sugbu sa 1st Mayor Arturo Radaza Underbone Challenge 2010 nga gikatakda karong Pebrero 28 didto sa Brgy. Basak, siyudad sa Lapu-Lapu.
Dul-an sa 90 ka mga riders gikan sa 10 ka koponan ang mag-ilog sa titulo sa maong lumba nga adunay upat ka kategoriya -- expert, novice, beginners ug special event alang sa mga motocross riders.
Mga tang-ang riders sama ni 2009 PTT “Rider of the Year” Gary Caneda Jr., Edwin Albaracin ug David Condeno mao ang mangulo sa Team Cebu.
Gawas sa mga Sugbuanong riders, moapil usab ang mga riders gikan sa Dumaguete, Bohol, ug Dipolog.
Ganting salapi ug tropeyo ang nagpaabot sa mga mananaog ning maong lumba nga gipasiugdahan sa Power Sports Racing (PSR) Promotions ni Jonas Adlawan uban sa suporta sa PTT Lubricants, Skygo Motorcycles ug race director Edsel Odulio. – BANAT NEWS