KUALA, Lumpur - Kagaya ng dapat asahan, tuluyan nang umabante sa championship series ang mga Patriots.
Tinalo ng Philippine Patriots ang Kuala Lumpur Dragons, 70-65 sa Game Two ng kanilang maikling best-of-three semifinals series para sa ASEAN Basketball League kamakalawa ng gabi sa MABA Stadium sa Kuala Lumpur, Malaysia.
Bumangon ang Patriots mula sa isang 16-point deficit sa second period upang tuluyan nang walisin ang Dragons, 2-0, sa kanilang serye.
Sinandigan ng Patriots ni head coach Louie Alas ang inihulog na 10-0 bomba na pinainit ng three-point shot ni Rob Wainwright at three-point play ni import Gabe Freeman sa pagsisimula ng fourth quarter.
Sa likod nina Filipino recruit Rudy Lingganay, Cameroonian Chris Kuete at Malaysian Shee Fai Loh, itinala ng Dragons ang malaking 35-19 lamang hanggang makabangon ang Patriots para sa 32-40 agwat sa halftime.
Isang 3-point play naman ni Jason Dixon kay Jamal Brown ang nagbigay sa Patriots ng 68-63 abante laban sa Dragons sa huling dalawang minuto ng laro.
Sa naturang tagumpay sa Dragons, hihintayin na lamang ng Patriots kung sino sa pagitan ng Singapore Slingers at Satria Muda BritAma ng Indonesia ang kanilang makakatagpo para sa championship series.
Tinalo ng Satria Muda BritAma ang Slingers, 74-45, sa Game Two upang itulak ang isang ‘do-or-die’ sa Game Three ng kanilang semis showdown.