CEBU, Philippines - Padayong mipakita og nindot nga labok ang pambato sa Cabancalan nga si Ramel Seos-e Jr. kinsa mirehistro sa iyang ika-20 nga daog dihang iyang gipukan ang iyang teammate nga si Jomar Caspe sa Summit Natural Drinking Water Amateur Boxing Series didto sa Gaisano Countrymall sa Banilad, ning syudad.
Ang otso anyos nga si Seos-e aduna nay amateur record nga 20 ka daog ug usang pilde, bugtong nakabuntog ni Seos-e mao ang National Youth Amateur Boxing bronze medalist nga si Richard Rama.
Gawas ni Seos-e, midaog usab ang mga laing Cabancalan boys nga sila si Richard Kilatan kinsa mipahunong ni Christian Bacolod sa 43 kgs., samtang si Reoxyl Tabogon mikulata ni Danlou Codilla sa Pit-os ug si Michael Romarate midabo-dabo ni Jesriel Gumapak sa Tagbilaran.
Apan gidemalas si Michael Cortes kinsa miyukbo ni Ronaldein Ignacio sa Gothong sa ilang sangka sa 30 kgs class.
Sa laing bahin, ang Banilad mikutlo usab og duha ka daog pinaagi nila ni Rammel Casañares ug Jeffrey Formentera. Si Casañares mikulata ni Christian Ouano sa Lahug sa 26 kgs.class, samtang si Formentera milupig sa puntos ni Raymund Namocatcat sa 38 kgs. division.
Si Dominique Casañares sa Bacayan mikastigo ni Jade Formentera sa 22 kgs class, samtang si Jun-jun Sultan mipaluhod ni Wenceslao Gakit sa 54 kgs. division.
Mokumpleto sa lista sa mga midaog mao sila si Vanz Cabahug sa Canduman sa 48 kgs. division, GK Gako sa Pit-os, Ryan Jade Canillas sa Toledo ug ang taga-Balamban nga si Robert Labanza sa 60 kgs. class. - Lemuel P. Maglinte (BANAT NEWS)