CEBU, Philippines - Segurado na nga maka-silver sila si Rheson Tarona ug Rommel Tuñacao sa Mandaue City human midaog batok sa ilang tagsa-tagsa ka kaatbang sa 2010 National Youth Amateur Boxing Championships didto sa Puerto Princesa, Palawan.
Si Tarona mi-abante sa finals human niya lumsi sa iyang kinumo si Victor Cornel sa Tagbilaran City aron pagposte og 16-12 nga kadaugan sa 30 kgs. division, samtang si Tuñacao miabante usab sa finals dihang iyang gipilde si Ben Vanguardia sa Valencia pinaagi sa decision.
Hinuon, tungason ang dalan nga baktason ni Tarona sa finals tungod kay ang iyang sangkaon mao ang mas taas ug mas inilog nga si Rafael Jalnaiz sa Misamis Oriental nga anak ni kanhi Olympian Roberto Jalnaiz.
Daku hinuon og pagsalig si Mandaue City coach Peter Cuizon sa katakus ug kaisog ni Tarona. Nagtuo siya nga dili atrasan ni Tarona si Jalnaiz ibabaw sa ring.
Sa iyang bahin, ang pambato sa Mandaue sa 26 kgs. nga si Richard Rama igo lang mitiltil og bronze medal human miyukbo ngadto ni Ian Fabila sa Puerto Princesa-B. – BANAT NEWS