Caimito gipanitan sa Lorega Proper A sa SK-FDH caging

CEBU, Philippines - Nagpungasi nga opensiba ang gilusad sa Lorega Proper A nga maoy ilang gigamit sa pag-ugkat og 103-88 nga kadaugan batok   sa Caimito sa nagpadayong aksiyon sa SK-FDH basketball tournament diha sa Barangay Satellite Complex sa Brgy. Lorega San Miguel, ning siyudad.

Si Marlon dela Cruz misiak og 31 puntos, si Nyuri Nodalo miposa og 19 puntos, samtang si Lito Joya midunol og 13 alang sa ikaduhang daog sa Lorega Proper A. 

Pagsugod pa lang, init na kaayo ang Lorega Proper A diin ilang gipakuratan ang Caimito pinaagi sa nagtusaktusak nga three-points ug fastbreak.

Ang guwardiya nga si Roel Dinopol mirehistro sa iyang season-high nga 27 puntos ug si Frederick Vallesfin mibugha og 21 puntos alang sa pilderong Caimito, kinsa nakahiagum sa ikaduha nilang sunod-sunod nga kapildihan. Si Elkie Entice miamot og 16 puntos sa nasugamak nga Caimito.

Sa main game, ang Quadrangle mirehistro sa ikaduha nilang daog pinaagi sa pagbuntog sa Lower Lawis sa iskor nga 101-92.

Si Virgilio Insot mibugwak og 32 puntos aron pangulohan ang Quadrangle. Sila si Junjun Nuñez ug Jermaine Carillo parehong milansang og 19 puntos sa maong kadaugan.

Samtang ang pilderong Lower Lawis gipangulohan ni Charlo Comahig, kinsa mibugha og 31 puntos, gisundan ni Samuel Casinillo sa iyang 19 puntos ug Randy Camaso nga adunay 13 puntos. – BANAT NEWS