CEBU, Philippines - Laing duha ka boksidor sa Mandaue City ang mi-abante sa semifinal sa nagpadayong 2010 National Youth Amateur Boxing Championships didto sa Puerto Princesa, Palawan.
Sila si Richard Rama ug Rommel Tuñacao mi-abante sa sunod hugna human gipilde ang tagsa-tagsa nila ka kaatbang.
Si Rama maoy midaog pinaagi sa puntos batok ni Radili Abas sa host Puerto Princesa sa 26 kgs. class.
Nakaipsot si Rama sa maong away ginamit ang iyang mga solidong body punches nga maoy nakaagni sa mga hurado aron ihatag kaniya ang daog.
Lahi sa nasinati ni Rama, sayon ra nga gitapos ni Tuñacao ang iyang sangka dihang iyang gipaundang si Ben Ortata sa Bacolod sa 28 kgs. class.
Si Rama makigharong ni Ian Fabial sa Puerto Princesa, samtang si Tuñacao makigsangka ni Ben Vanguardia sa Valencia. – BANAT NEWS