Lorega Proper B midemolis sa Echavez sa SK-FDH hoopfest

CEBU, Philippines - Mipahungaw sa ilang kalagot ang Lorega Proper B human sa ilang pagka-forfeit sa miagi nilang duwa dihang ilang gikuninitan ang Echavez, 92-79 sa nagpadayong aksiyon sa SK-FDH hoopfest niadtong miaging adlaw diha sa Lorega San Miguel Mayor’s Barangay Satelitte Complex.

Ang tandem nila ni Rex Mabaga ug Bing Zabate mao ang mituboy sa Lorega Proper B alang sa ikaduha nilang kadaugan .

 Si Mabaga mipug-ok og 10 puntos, samtang si Zabate mihirit og 13 puntos.

Nakawang lang ang game-high nga 36 puntos ni John Mark Reynes kay kulang kini sa suporta gikan sa iyang kaubanan hinungdan sa ilang kapildihan.

Sa laing duwa, mihipos sa labing una nilang daog ang Camansi human gipilde ang mas lig-on nga San Miguel B sa iskor nga 104-98, samtang ang Lawis mikutlo sa ikaduha nilang daog pinaagi sa paglubong sa San Roque sa iskor nga 103-74.

Sila si Mark Cuizon ug Cris Carreon nagkumboya og 41 puntos alang sa Lawis.

Mirehistro sab og daog ang Itom Yuta sa ilang duwa batok sa Lomar sa iskor nga 95-86.

Gipasiugdahan sa opisyales sa Brgy. Lorega San Miguel, ang makampiyon sa maong liga makaangkon og P3,000, ang second placer makadawat og P2,000 ug ang third placer mobulsa og P1,000. – BANAT NEWS