RPower Taekwondo Club milangkat sa overall championship

CEBU, Philippines - Gilangkat sa RPower Taekwondo Club ang overall championship sa 5th Carlos Palanca Jr. (CPJ) Regional Taekwondo Championships niadtong miaging adlaw diha sa University of San Carlos-North Campus (USC-NC) gym.

Ang garbo sa Sugbu nga RPower TC mipatigbabaw sa laing 11 ka partisipanteng koponan human mihakot og 16 ka golds, pito ka silvers ug tulo ka bronzes.

Ang RPower squads mikolekta og lima ka bulawan sa elementary boys division kortesiya ni Archie James Cejar sa category one advance, Charles David Labister sa category two advance, Kylle John Flores sa category five advance, Bon Nico Quijano sa category six advance ug Rene Villacorta sa novice.

Sa pikas bahin, si Jessa Liberty Callino maoy nidominar sa category five advance, si Charisse Labiste maoy nanghawod sa category 5A advance ug si Florlyn Cabo maoy naghari sa category six novice.

Ang RPower's junior boys teams mihakot og upat ka bulan pinaagi nilang Carl Ricarte sa lightweight (novice), Lord Jay Guia sa featherweight (advance), Keith Brian Fernandez sa bantamweight (advance) ug John Paul Tomarse sa finweight (advance).

Sa seniors class, si Gerald Paglinawan ug Larry Tabelon maoy naghari sa men's finweight ug bantamweight (advance).

Sa laing bahin, si Jenesa Vergara maoy milangkat sa women's bantamweight title (advance), samtang si Lovely Rose Lim misakmit sa korona sa lightweight (advance).

Ang MDT mipahiluna sa ikaduha sa overall uban ang 10 golds, unom ka silvers ug upat ka bronzes, samtang ang Team Rama mi-okupar sa ikatulo sa ilang upat ka golds, upat ka silvers ug lima ka bronzes.

Ang mga mananaog maoy morepresentar sa rehiyon alang sa CPJ National Taekwondo Championships karong Pebrero 6-7 didto sa Rizal Memorial Sports Complex sa kaulohan.   (BANATNEWS)