Viloria luwas na sa kuyaw nga kahimtang

CEBU, Philippines - Luwas na sa kuyaw nga kahimtang ang Fil-American nga si Brian “The Hawaiian Punch” Viloria human sa makalilisang niyang gidangatan sa kamot ni Colombian Carlos Tamara kinsa midaog pinaagi sa 12 round TKO, niadtong Sabado sa ilang sangka didto sa Cuneta Astrodome.

Human sa ilang sangka sa main event sa “Collision Course” boxing card, diin nailog ni Tamara ang IBF light flyweight title, gidali paghatud si Viloria didto sa San Juan de Dios Hospital human mawad-i sa iyang panimuot sa dressing room tungod sa sobrang kaluya.

Gikan sa San Juan de Dios Hospital, gibalhin si Viloria didto sa Makati Medical Center aron mopailawum sa CT scan aron masuta kung wala bay bun-og ang iyang utok ug X-ray aron usab makita kung wala bay bali ang gimulo niyang sakit sa dughan.

Sa pakighinabi sa dzMM, si Dr. Nasser Cruz sa Games and Amusement Board (GAB), mipahibalo nga luwas na sa kuyaw nga kahimtang si Viloria kinsa nakahiagum usab og tres sentimetros nga gisi sa iyang tuong kilay agi sa sinukmagan ni Tamara.

Hinuon, giklaro sa mga doctor nga nag-atiman ni Viloria nga kinahanglan pa nga magpabilin ang boksidor og napulo ka adlaw dinhi sa Pilipinas sa dili pa siya tugutan nga mouli ngadto sa Estados Unidos.

Ang manager ni Viloria nga si Gary Gittelsohn sa iyang email ngadto sa Associated Press, nagkanayon nga kinahanglan pa nga makabawi sa iyang kusug ang iyang boksidor sa dili pa kini hingpit nga mobiyahe pauli ngadto sa Estados Unidos.

Si Viloria maisugong nakigsangka ni Tamara sa unang walo ka round, apan nakitaan siya og kaluya paingun ngadto sa round 12, nga maoy nakahatag og kadasig sa Colombian nga si Tamara nga dabo-dabohan ang Pinoy fighter.

Sa iyang bahin, mipadangat usab sa iyang kabalaka ang kababayan nga si Nonito Donaire Jr. sa nahiaguman ni Viloria. Ang WBA interim super flyweight champion nga si Donaire mipadayag sa iyang pag-ampo alang sa daling recovery ni Viloria. - Lemuel P. Maglinte (BANAT NEWS)