CEBU, Philippines - Wala na gyu'y makababag sa opening leg sa 2010 MS Motosuit Motocross Series nga himuon karong adlawa diha sa Brgy. Jubay, Liloan.
Ang opening leg nga ulohan og "Manuel Wagas Cup" ipahigayon unta niadtong Domingo, apan tungod sa dili makiangayong panahon gisibog kini karong adlawa.
Pipila ka kahugpongan ang nipadayag sa ilang partisipasyon ning usa ka adlaw nga kompetisyon sama sa Quickflight Racing ni Pepo ug Popeye Rubi, Power Sports Racing ni Jonas Adlawan, Keiz BJ Racing ni Siegfred Ornopia, NR Racing ni Nonoy Reluya, BJ Pepito Racing ni Malou Pepito, Flores Racing ug MTS Danao Racing.
Mga riders gikan sa nagkalain-laing dapit sa Kabisay-an ug Mindanao ang gilaumang mosalmot sa lumba.
Si Jon-jon Adlawan sa PSR mosugod sa iyang title defense sa experts, samtang ang iyang teammate nga si Juvenille Abellar mosugod sab og kampanya alang sa iyang sunod-sunod nga kampiyonato sa intermediate category.
Ang 2008 Rider of the Year awardee nga si Ornopia modepensa sab sa iyang titulo sa Executive-A, samtang si John Flores sa novice open production.
Lain pang modepensa sa ilang titulo mao sila si Dongkey Sanchez sa open ug local enduro ug beginners open production, Jun Enriquez sa Executive-B, Dr. Felipe Montejo sa Executive-C, Earl Jean Brylle Ornopia sa mini class ug BJ Pepito sa pewee under-7 bracket. (BANATNEWS)