San Miguel A nagsolo sa liderato
CEBU, Philippines - Naangkon sa San Miguel A ang ikaduha nilang sunod-sunod nga kadaugan human nila gipilde ang Lorega Echavez Youth Council (LEYC) Team, 113-95 aron magsolo sa SK-FDH hoopfest sa miaging gabii diha sa Mayor's Barangay Satellite Complex sa Lorega San Miguel, ning siyudad.
Sikit pa ang kumbati sa duha ka koponan sa first half ug diha na mibuylo ang San Miguel sa ikaduhang tunga dihang si Francis James Rafols mipatusak og tulo ka triples aron hatagan ang iyang koponan og 101-88 nga labaw sa nahabiling 5:02 sa final period.
Si Anthony Falco maoy topscorer sa San Miguel pinaagi sa iyang 33 puntos, gisundan ni Rafols nga mibunal og 32 puntos, samtang si Froilan Cueva miduslit og 16 puntos. Si Jabbar Taparong miabuno og 14 puntos ug si Ray Pagpulaan midunol og 10 puntos.
Ang pilderong LEYC gipangulohan ni Samuel Casinillo, kinsa mibugha og 24 puntos, samtang si Randy Camaso ug Charlo Comahig mitira og 15 puntos matag usa.
Sa laing duwa, ang Team Serias mipukan sa Riverside sa iskor nga 100-95.
Si Joseph Cabajar mirehistro og tournament-high 48 puntos alang sa Team Serias, si Ricky Garcia mitampo og 36 puntos ug si Edgar Esperanza miamot og 26 puntos.
Gipasiugdahan sa opisyales sa Brgy. Lorega San Miguel, ang makampiyon sa liga mobulsa og P3,000, ang second placer makadawat og P2,000 ug ang third placer makaangkon og P1,000. (BANATNEWS)
- Latest
- Trending
