AJY Bong milangkat korona sa LLBA Christmas League

CEBU, Philippines - Nangayo pa og overtime ang AJY Bong una nila tumbaha ang Tango, 101-93 aron masakmit ang championship trophy sa Lapu-Lapu Basketball Association (LLBA) Christmas Basketball League 2009 niadtong Enero 15 diha sa Villas Magallanes Gym sa Sta. Lucia Property sa barangay Basak, dakbayan sa Lapu-Lapu.

Unom ka players nga gipangulohan ni team owner Alan Yu, Tata Bardago ug Joel Ochea ang parehong mirehistro og double figures alang sa AJY Bong.

Pirmeng naglabaw ang AJY Bong gikan sa pagsugod, hinuon wala kini makabiya og daku diin nakabentaha lang kini og dos puntos sa halftime, 41-39.

Nakapabor na unta ang Tango dihang ang kinakusgan sa AJY Bong nga si Bardago, migradwet sa tunga-tungang bahin sa third period. Misamot kapiang ang AJY Bong dihang misunod og gradwet si Yu nga naghatag og dakung bentaha sa Tango. Apan walay nahimo ang Tango pag-ilog sa momentum bisan pa sa paningkamot nilang Jimboy Igot, Lordet Jornales, Rene Cuadra ug Ryan Ceniza, kay grabe sab kaayong nakaladlad sa ilang katakus silang Joel Ochea, Jun Acuña, Joman Cosep ug Celso Igot.

Sayo untang malangkat sa AJY Bong ang korona dihang milabaw na kini og singko puntos sa iskor nga 83-78, apan si Igot mipakita og milagro dihang mihimo kini'g 3-point play sa nahabiling 20 segundos. Napun-an pa kini og laing dos puntos ni Igot dihang naka-intercept na sab kini nga nakapatabla sa duwa, 83-all hinungdan sa overtime.

Sa dugang singko minutos, ang AJY Bong nagmabinantayon na sa ilang lihok ug wala mohatag og higayon sa Tango nga makasikit pa pag-usab.

Sila si Yu, Ochea ug ang MVP nga si Bardago mikulit og 16 puntos matag usa, si Acuña miabuno og 14 puntos, si Cosep mitimbre og 12, samtang si Igot mitimang og 11 puntos.

Ang pilderong Tango ni team owners Dr. Michael Ouano ug Dr. Ryan Ceniza gipangulohan ni Jimboy Igot pinaagi sa iyang 25 puntos, gisundan ni Jornales nga adunay 22 puntos ug si Cuadra mitampo og 17 puntos.

Sa pasiunang duwa, ang 3M-RJ milubong sa COMFA sa iskor nga 87-77 aron sa pagpahiluna sa ikatulo nga dapit.

Sa naandan, sila si Ram Gomez ug Pompie Ngujo mao gihapon ang mga bida sa 3M-RJ. Si Gomez miligwat og 28 ug si Ngujo mikandos og 21 puntos. Si Tofer Sayson mikadlit og 14 puntos alang sa 3M-RJ ni team owners Renato Casinillo ug Christopher Sayson.

Samtang ang Comfa ni team owner Ely Gomoz, gipangulohan ni Ruben Dignos nga mibugha og 27 puntos, gisundan ni Amay Palad nga adunay 20 puntos, si Arman Lamoste mipaksit og 16 puntos ug si Ernie Giganto milaksi og 12 puntos. Ang point guard nga si Jonard Barong, kinsa maoy topscorer atol sa semis pinaagi sa iyang 20 puntos, igo lang mi-iskor og otso puntos.

Puntos Matag Usa

Unang duwa:

3M-RJ (87) - Ram Gomez 28, Pompie Ngujo 21, Tofer Sayson 14, Lorena 8, Casinillo 8, Igot 4, Fuentes 2, Dacoco 2

COMFA (77) - Ruben Dignos 27, Amay Palad 20, Arman Lamoste 16, Ernie Giganto 12, Jonard Barong 8

Ikaduhang duwa:

AJY-BONG (101) - Yu 16, Bardago 16, Ochea 16, Acuña 14,   Cosep 12, C. Igot 11, Daño 9, D. Igot 8, Labadan 2

TANGO (93) - J. Igot 25, Jornales 22, Cuadra 17, Ceniza 10, Gutib 6, Fuentes 5, Lirasan 2, Ouano 2, Aton 2. – BANAT NEWS