MANILA, Philippines - Sumandig ang Olivarez College Sea Lions sa mala-linta nilang depensa sa perimeter upang idiskaril ang Technological Institute of the Philippines Engineers, 69-62 kahapon at isubi sa kauna-unahang pagkakataon ang isang finals slot sa 17th National Capital Region Athletic Association (NCRAA) men’s basketball tournament.
Itinulak ng Sea Lions ang Engineers sa pitong ulit na pagtatapon ng bola sa huling limang minuto ng sagupaan upang maselyuhan ang kanilang panalo sa semifinal knockout game sa kanilang bakuran sa Olivarez College gym sa Sucat, Parañaque.
Ang panalong ito ng Sea Lions ang nagsaayos ng kanilang titular showdown sa Rizal Technological University Blue Thunders sa Lunes.