MMA fighters mag-abot sa 'Cage of Vengeance'

CEBU, Philippines - Magkuros na sab ang dalan sa duha ka MMA fighters Rodel 'Kid' Oraiz ug Leonard Delarmino sa main event sa "Cage of Vengeance 2010" karong adlawa diha sa Mango Square Mall sa Gen. Maxilom Avenue.

Ang kanhi pro-boxer nga si Oraiz, kinsa sakop kaniadto sa Ben Sun Stable tinguhang mobawos ni Delarmino sa ilang ikaduhang panag-abot sa 139 lbs. category.

Ang pambato sa Iloilo Capanay Biron Foundation nga si Delarmino mibahad nga iyang tiwasan si Oraiz human sa una niyang kadaugan human niya gipaundang ang naulahi pinaagi sa knee strike.

 Sa supporting bout, si Adrian Hillana sa Bacolod Submission Sport makigsangka ni Ronel Del-is sa Muay Thai sa three-rounder bout ubos sa 159 lbs. class.

Mokompleto sa undercard bouts, mao sila si Agustin Belarmino batok Erik Regalado, Rogelito Plomeda batok Johnjier Torbiso, Vincent Faburada batok Adamson Torbiso, Ridel Calbog batok Ritchel Colina, Nilrax de Cafe batok Judy Arsenal, Greg Rufino kinsa makigbinukbukay ni Jessie Adaba ug Romelo Esfra batok ni Victor Catubig.

Ang MMA tournament gipasiugdahan sa Fearless Fighting Championship (FFC) ug Extreme Combat Sports (ECS). – BANAT NEWS