CEBU, Philippines - Gibarugan nila ni Milan 'Melinyo' Melindo ug AJ 'Bazooka' Banal sa ALA Gym ang ilang mga saad nga pildihon ang mga langyaw nilang kaatbang sa "Bakbakan sa Sinulog!" niadtong miaging gabii diha sa Waterfront-Cebu City Hotel and Casino sa Brgy. Lahug, ning siyudad.
Nakab-ot ni Melindo ang iyang damgo nga mamahimong three-time regional champion sa tulo ka managlahing dibisyon human niya giilog ang WBO Youth Intercontinental flyweight championship title gikan sa mga kamot ni Anthony 'Baby Assasin' Villareal pinaagi sa usa ka unanimous decision.
Sayong gipakita ni Melindo ang iyang kabangis dihang usa ka makusog nga right hook ang iyang gipatama sa apapangig ni Villareal nga maoy hinungdan sa pagkasukarap sa Amerikanong boksidor.
Hinuon, gipamatud-an ni Villareal nga usa siya ka lig-on nga boksidor dihang iyang nahuman ang gikatakda nilang 12 ka hugna.
Tulo ka hurado ang mihatag og 97-93, 95-94 ug 96-93 pabor ngadto ni Melindo.
Ang lumad nga taga- Cagayan de Oro City nga si Melindo nagpabiling walay pilde sa 20 niya ka away, diin lima niini gikan sa knockout, samtang si Villareal nakahiagom sa ikatulo niyang kapildihan uban ang siyam ka daog.
Dili sama ni Melindo, sayong gitapos ni Banal ang iyang Mehikanong kaatbang nga si Cecilio 'Boga' Santos, kinsa iyang gipakamang sa ikaupat nga round.
Si Banal mibuhi og usa ka makabungog nga right hook ngadto sa ulo ug gisundan sa nagpungasi nga kombinasyon ang mipalup-og sa beteranong si Santos sa nahabiling 35 segundos sa round 4.
Sa maong kadaugan, si Banal mipalambo sa iyang rekord ngadto sa 21-1-1, 16 KOs, win-loss-draw, samtang si Santos nikanaog sa 24-11 win-loss record.
Gawas ni Banal, yano ra usab nga gidispatsar nila ni James Bacon ug Larry 'Bon Jovi' Canillas (9-2, 7KOs) ang ilang mga kontra gikan sa Thailand sa undercard sa maong boxing event.
Ginamit ang mga solidong body punches, gipakamang ni Bacon (13-1, 8KOs) si Thitichon Singwancha (12-3, 4KOs) sa 55 segundos sa round four, samtang si Canillas (9-2, 7KOs), kinsa nailhan sa iyang makusog nga tuong kumo mipahagsa ni Petch Twins Gym ( 8-3-1, 6KOs) sa 1:27 sa second round. – BANAT NEWS