CEBU, Philippines - Magpinaksitay na ang duha ka lig-ong koponan -- AJY Bong ug Tango sa kampiyonato sa Lapu-Lapu Basketball Association (LLBA) Christmas League 2009 karong gabii diha sa Villas Magallanes Gym, Lapu-Lapu City.
Ang duwa sugdan sa alas-8 sa gabii human sa engkuwentro tali sa Comfa ug 3M-RJ nga mag-ilog sa ikatulo sa alas-7 sa gabii.
Ang AJY Bong ni team owner Alan Yu unang miangkon og luna sa finals pinaagi sa pag-iskor og 71-70 nga kadaugan batok sa 3M-RJ ni team owners Renato Casinillo ug Christopher Sayson, samtang ang Tango ni Dr. Michael Ouano ug Dr. Ryan Ceniza mibira sa katapusang lingkoranan human nila gipilde ang Comfa ni team owner Ely Gomoz, 69-66.
Si Tata Bardago maoy topscorer sa AJY nga miligwat og 19 puntos, gisundan ni Alan Yu sa iyang 14 puntos. Si Joel Ochea miamot og 11 puntos ug si Jun Acuña mitampo og 10 puntos.
Ang 3M-RJ gipangulohan sab ni Ram Gomez, kinsa miposa og 14 puntos, gisundan ni Pompie Ngujo nga adunay 13 puntos ug Christopher Sayson sa iyang 12 puntos.
Sa laing bahin, si Rene Cuadra m-iskor og 16 puntos aron pangulohan ang Tango, si Lordet Jornales mipupo og 15 puntos, samtang si Rene Cuadro miabuno og 16 puntos.
Sila si Eddie Bontes ug Buldog Ybañez, parehong mi-iskor og 13 puntos alang sa naparot nga Comfa, si Arman Lamoste mitimang og 11 puntos ug si Ely Gomoz mitimbre og 10 puntos. (BANATNEWS)