2 ka Sugbuanon mosugal sa ilang titulo sa URCC Cebu 5

CEBU, Philippines - Isugal sa mga Sugbuanong Demetrio 'The Standard' de la Torre ug Maxlito 'Hyper Eagle' Yong ang tagsa-tagsa nila ka regional title batok sa ilang mga kaatbang sa ipahigayong Colt 45-Universal Reality Combat Challenge (URCC) Cebu 5: Deliverance karong gabii diha sa Cebu International Convention Center (CICC).

Ang Mandauehanon nga si de la Torre, modepensa sa iyang Visayas pinweight title batok ni Victor 'The Gladiator' Torre sa Bacolod, samtang si Yong mosuway pagpukan ni Remus Belguerra sa Ilo-ilo City.

Gawas sa duha ka championship matches, magbinukbukay usab ang duha ka langyaw'ng MMA fighters nga si Razi 'The Iranian' Jabarri sa Way of the Champion stables batok sa Briton nga si Tom 'The Hawk' Woodfin sa main event.

Si Jerome 'The Cruiser First' Torbiso, kinsa mihulip sa dapit ni Cary 'The Prince' Bullos mosukod sa abilidad ni Arie Zarco.

Si Bullos dili makapakita og aksiyon kay naigo sa dengue.

Mokompleto sa undercard bouts, mao sila si Siloy 'Black Smith' Analito batok ni Mark 'Buhawe' Revalde, Argie Junsay batok ni Jerlyn 'Matador' Liera, Wilfredo 'Tiger Force' Cajurao batok ni Geronimo 'Etac' Sevilla, Jecar 'The Alligator' Tumulak batok ni "The Grip" Intoy ug Ritchie Redman batok ni Engi 'The Destroyer' Piloto.

Ang Mixed Martial Arts (MMA) showdown gipasiugdahan sa URCC uban sa pagpaluyo sa Games and Amusement Board (GAB). (BANATNEWS)