3M-RJ nimasaker sa All Box Packaging sa LLBA Christmas League 2009

CEBU, Philippines - Walay paghubas ang kainit nga gipabuhagay sa 3M-RJ, kinsa milubong sa All Box Packaging Inc., 80-56 sa nagpadayong aksiyon sa Lapu-Lapu Basketball Association (LLBA) Christmas League 2009 diha sa Villas Magallanes Gym sa Sta. Lucia Property sa barangay Basak, dakbayan sa Lapu-Lapu.

Si Pompie Ngujo mibuhos og 22 puntos ug si Ram Gomez miabuno og 18 puntos alang sa 3M-RJ nga midikta sa tiyempo sa duwa human miposte og 22-14 nga bentaha paghuman sa first period.

Gikan sa 41-28 sa halftime, ang 3M-RJ padayong midumog sa All Box aron inaton ang labaw ngadto na sa 22 puntos human sa tulo ka kuwarter, 69-47.

Sa maong labaw, nakapanimaho na og daog ang 3M-RJ, kinsa wala gyud mohatag og higayon sa All Box nga makasikit.

Si Pompie Ngujo mi-iskor og 22 puntos aron pangulohan ang 3M-RJ ni team owners Renato Casinillo ug Christopher Sayson. Si Ram Gomez miamot og 18 puntos ug si Peter Sayson mitampo og 11 puntos.

Ang pilderong All Box team owner ug ni ex-PBA stalwart Jun Tan gipangulohan sab ni Edgar Lungay pinaagi sa iyang 16 puntos.

Sa laing duwa, gilubong sab sa Yan C Rico ni team owner Atty. Rico Amores ang Ace Penzionne ni team owner Tony Amistad sa iskor nga 68-52.

Si Alvin Bentazal maoy topscorer sa Yan C Rico nga mibahog og 18 puntos. Si Idalat De la Peña mitimbre og 13 puntos, samtang si Lito Magat miabuno og 12 puntos alang sa maong kadaugan.

Mipaksit sab og daog ang Tango human maka-ipsot gikan sa mga kamot sa I3R Motor Parts sa iskor nga 62-61 sa kulbahinam nilang duwa.

Ang Tango nilang Dr. Michael Ouano ug Dr. Ryan Ceniza, gipangulohan ni Cuadra, kinsa miburak og 17 puntos, samtang si Mario Bancale mao sab ang nangulo sa I3R pinaagi sa iyang 16, samtang si team owner Dandan Ramos misansan og 12 puntos.

PUNTOS MATAG USA

Unang duwa:

3M-RJ (80) - Ngujo 22, Gomez 18, Sayson 11, Lorena 6, Igot 6, Casinillo 4, Fuentes 4, Dacoco 2, Soroño 2, Aying 2

ALL BOX (56) - Lungay 16, Quijano 10, Hiyas 8, Sevilla 6, Aying 5, Aselom 4, Amodia 2, De Jesus 2

Ikaduhang duwa:

TANGO (62) - Cuadra 17, Igot 10, Fuentes 7, Jornales 7, Gutib 7, Ceniza 6, Ouano 5, Atad 2

I3R (61) - Bancale 16, Ramos 12, Bensi 9, Luayon 8, Orque 4, Espinosa 2, Francisco 2

Ikatulong duwa:

YAN C RICO (68) - Bentazal 18, De la Peña 13, Magat 12, Adlit 6, Bardago 4, Evangelista 4, Simbajon 4, Alian 3, Iscuyos 2

ACE PENZIONNE (52) - Aying 14, Maloloy-on 10, Fausto 7, Patalinghug 5, Lapoja 4, Cañete 4, Ompad 4, Decembrano 2, Cosep 2   (BANATNEWS)