CEBU, Philippines - Si team captain Roy Lansang milansang og duha ka mahinungdanong free throws aron baswaton ang Jonadel's Inn & Suite ni team owner Sonny Ponteras ngadto sa 77-76 nga kadaugan batok sa JKT aron langkaton ang kampiyonato sa Norvic Abella Cup Christmas basketball league dili pa dugay diha sa Labangon covered court.
Sa sayo pa, ang RCAF ni team owner Romeo Faunillan midaog sab batok sa DHAGZ ni Daks Dongon sa iskor nga 89-85 aron angkonon ang ikatulong dapit.
Ang Jonadel's mao kanunay ang naglabaw ug miposte kini og 55-43 nga bentaha paingon sa final period. Apan ang JKT mipakita sa ilang katakus ug ilang gipapas ang labaw ug gani ila pa nga nailog ang labaw, 76-76 sa nahabiling 10 segundos sa duwa.
Sa daginutong segundos, si Lansang gi-foul samtang misuway kini'g lusot nga naghatod kaniya ngadto sa free throw line. Si Lansang yano kaayong mipasulod sa iyang duha ka free throws nga maoy miselyo sa kadaugan sa Jonadel's.
Si Lansang mipupo og 12 puntos, apan si Tinong Ceros maoy topscorer sa Jonadel's pinaagi sa iyang 24 puntos.
Sa laing bahin, sila si Edgar Tapere ug Jong Wilbur mao sab ang nangu sa RCAF nga nagkumboya og 34 puntos, samtang si Dicksim Kintanar maoy nangu sa pilderong DHAGZ sa iyang 29 puntos.
Si Ceros maoy napiling MVP ug maoy nangulo sa Mythical Five uban nilang Lansang, Kintanar, Bagares ug Junel Cortes.
Lain pang individual awardees mao sila si Lansang (best guard), Cortes (best center), Bagares (best forward), Gilbert Violango (top rookie_ ug Alwen Tabasa (best defensive player). Ang sportsmanship award gihatag ngadto ni Richard Abella.
PUNTOS MATAG USA
Unang duwa:
RCAF (89) - Tapere 19, Wilbur 15, A. Tabasa 14, Sabanal 12, R. Tabasa 8, Faunillan 7, M. Martinez 4, Rusiana 2, Mosqueda 2, W. Martinez 2, Sarucam 2, Ortega 2
DHAGZ (85) - Kintanar 29, Donggon 19, Alibawan 18, Villanueva 9, Pilares 6, Cajes 2, Daclan 2
Ikaduhang duwa:
Jonadels (77) - Ceros 24, Lansang 12, Cortes 10, Treyes 8, W. Ponteras 6, Caster 6, S. Ponteras 5, L. Tabasa 4, B. Abella 2
JKT (76) - Bagares 16, Vergara 14, Cabanilla 10, Aguilon 8, Zafra 6, Deldig 6, Bernal 4, Sarucam 3, Tabasa 3, G. Abella 2, Geyroza 2, Caguindangan 2