Tanui, Tolentino hari'g reyna sa Cebu City Marathon

CEBU, Philippines - Gikoronahan isip hari ug reyna ang Kenyan nga si Willy Tanui ug ang taga-Cagayan De Oro nga si Aileen Tolentino human sila mikampiyon sa tagsa-tagsa nila ka dibisyon sa labing unang Cebu City Marathon kagahapon didto sa Asiatown I.T Park sa Brgy. Apas ning siyudad.

Si Tanui kinsa usa lang sa mga Kenyan runners nga midagsa dinhi sa Sugbu aron musalmot sa labing dakung lumba karong tuiga, mitapos sa makutas nga 42K marathon sulod sa duha ka oras, 30 minutos ug 57 segundos.

Gipukan ni Tanui ang iyang kababayanug pambato sa Cebu nga si Simon Losiaboi kinsa mipahiluna sa ikaduhang dapit sa oras nga 3:32.23.

Hinuon, kini mao palang ang unang higayun nga midagan si Losiaboi sa 42K marathon dili sama ni Tanui nga usa na ka beteranong marathoner.  

Mokumpleto sa runner-ups sa men's division mao ang National Milo Marathon second placer nga si Eric Panique sa ikatulong dapit, Kenyan nga si David Kipkoech Kipsang sa ikaupat ug Elmer Sabal nga maoy fifth placer.

Wala usab magpauwahi ang Cebuanong si Mendel Lopez kinsa mitungtung sa ikaunom nga dapit.

Sa iyang bahin, nakabawus si Aileen Tolentino sa iyang karibal nga si Mary Grace Delos Santos dihang gibulhutan niya kini sa katapusang 50 metros aron makuha ang titulo sa women's division sa 42K marathon.

Samtang ang Cebuana nga si Miscelle Gilbuena ug taga-Bacolod nga si Hannah Jean Delfin mao ang third ug fourth placer ug ang Kenyan nga si Susan Jemutai Chepwony mao ang mipwesto sa ikalimang dapit.

Sa 21 k half-marathon, nanghawud ang mga Sugbuanang sila si Madelyn Carter ug Leizl Lumindas-Gitaruelas kinsa misakmit sa una ug ikaduhang dapit uban ni Ellen Tolentino nga maoy third placer sa women's division.

Sa laing bahin, si Gitaruelas pormal nga mipahibalo sa iyang pagretiro sa running ug nagkanayon nga ang Cebu City Marathon mao na ang katapusang lumba nga iyang salmutan.

Si Alquin Bolivar maoy nangharus sa men's division, gisundan sa iyang mga runner-ups nga sila si Crifrankreadeal Indapan ug Gerald Sabal.

Mikampiyon usab sila si Joel Delposo ug Mary Joy Tabal sa 5K run sa lumba nga gipasiugdahan sa kagamhanan sa siyudad sa Sugbu ug sa Cebu Executive Runner's Club (CERC). - Lemuel P. Maglinte (BANAT NEWS)