CEBU, Philippines - Parehong mihakot og bulawan sila si Prince Lee ug Adela Canillo human nila dominaha ang tagsa-tagsa nila ka dibisyon sa Sinulog Kiddy Run kagahapon diha sa Banilad Town Centre (BTC).
Si Lee, 12 anyos, sa Lutopan Toledo City maoy nanghari sa boys 13-under human niya gitapos og dagan ang 3-kilometros nga lumba sud sa 11:12 minutos. Gipilde niya ang iyang igsuong si Joey Jr., 11-anyos kinsa nagligas lang og 30 segundos. Miangkon sa bronze mao si Justine Chiongbian, 11 anyos, sa St. Benedict School sa oras nga 12:11 minutos.
Sa iyang bahin, ang 12 anyos nga si Canillo mao sab ang nanghawod sa 13-under nga mi-oras og 11:27 minutos aron pagsakmit og gold sa girls division. Gisundan siya ni May Jeameka Contemplo, 11-anyos, nga mitapos sa lumba sud sa 12:23 minutos.
Lain pang midaog og gold mao sila si Alexis Ylanan sa Paknaan, Mandaue City ug Karina Curvo sa St. Theresa’s College sa 10-under 2K run.
Sa 1K run, si Cyril Borbajo sa Hillride, Talamban ug Krisianyl Alianic sa San Fernando, Cebu mao sab ang kampiyon sa boys ug girls 8-under age group. (BANATNEWS)