CEBU, Philippines - Misaad si Anthony 'Baby Assassin' Villareal nga iyang igawas ang tinagoang hinagiban nga gamiton niya sa pagpukan ni ALA Boy Milan 'Melinyo' Melindo sa ilang sangka alang sa WBC Inter-continental Youth flyweight title sa main event sa “Bakbakan sa Sinulog!” karong Enero 14 diha sa Waterfront Cebu City Hotel and Casino.
Si Alberto Franco, ang trainer ni Villareal, miingon nga lahi ang Mexican-American boxer sa tanang mga gikasangka ni Melindo ug ang estilo niini nga daw susama sa inawayan ni Floyd Mayweather Jr. ug Shane Mosley.
Sumala pa ni Franco nga mas nakapabor usab sila sa gidak-on ug kusog ug ilang nakita nga walay gamay'ng kahigayonan si Melindo nga modaog.
Sa press conference kagahapon diha sa Patio Isabel, ang 22-anyos nga si Villareal namahayag nga wala siya'y plano nga ipailog ang iyang bakus ni Melindo ug andam siya nga pildihon ang two-division regional champion sa kaugalingon niining balwarte.
Si Villareal (9-2, 4KOs) midaog sa katapusan niyang sangka batok ni kanhi undefeated Miguel Roman aron maangkon ang WBC Youth belt, samtang si Melindo (19-0, 5KOs) naglaraw usab nga mokutlo sa ikatulo niyang regional title sa tulo ka managlahing timbang.
Sa supporting main event, mopakita na usab sa iyang kabangis ang laing ALA stable star nga si AJ 'Bazooka' Banal (20-1, 16KOs) batok sa Mehikanong si Cecilio 'Boga' Santos Galindo (24-11-3, 14KOs).
Ang beteranong si Santos bag-o lang mihaw-as gikan sa iyang first round knock-out nga kadaugan batok sa kababayan niini nga si Cesar Martinez.
Sa undercard, duha ka ALA prospects nga sila si James Bacon ug Larry 'Bonjovi' Canillas ang makigbinukbukay usab batok sa mga bisitang Thai boxers.
Si Bacon (13-1, 8KOs) makigsinukliay og kumo batok ni Thittichon Singwancha (12-3, 2KOs), samtang si Canillas (11-1,11KOs) moharong ni Pet Twin Gym (8-3-1, 6KOs).
Mokatkat usab sa ring si Jojo Intor sa Negros Occidental batok ni Romnick Hoybia sa Bohol ug Jonel Gadapan sa Cagayan De Oro batok ni Jayson Inso sa Mandaue.
Duha ka national amateur boxers ang mopakita usab sa ilang katakus sa maong boxing event.
Si Adonis Cabalquinto makigharong ni Jimmy Vallares, samtang ang anak ni kanhi Asian Games gold medalist ug two-time Olympian nga si Elias Recaido nga si Karina Jane Recaido makigsangka usab batok ni Irish Magno.
Ang mga tiket mapalit sa P1,500 alang sa VIP first row, P1,250 sa VIP second row, P1,000 sa VIP third row, P500 sa ringside, P300 sa ballroom ug P250 alang sa balcony.
Sa laing bahin, ang mga protagonista sa “Bakbakan sa Sinulog!” gikatakdang mag-abot ugma sa alas-5 sa hapon diha sa Banilad Town Centre (BTC) alang sa usa ka public work-out. (BANATNEWS)