CEBU, Philippines - Migahin og P50,000 ang kagamhanan sa dakbayan sa Sugbu alang sa mga mananaog sa usa ka bulan nga 2009 Mayor Tomas Osmeña and Vice Mayor Mike Rama Inter-barangay Darts Tournament nga tak-upon karong gabii diha sa Baseline Sports and Recreation Center.
Ang Team 11 maoy mitukob sa P15,000 alang sa ilang paghari sa four-man team event. Ang grupo gilangkuban nilang Jourgein Villamor, Warren Mepisa, Winnie Ocañada ug Adrian Delos Reyes.
Gipukan sa Team 11 ang Team 5 nilang William Encorporado, Jerome Perales, Gerald Badayos ug Nilo Janson. Ang Team 5 mibulsa og P7,000.
Ang Team 8 nga gipangulohan ni Marlito Patundo, nakaangkon og P4,000, samtang ang Team 6 ni Arsil de Asia Godinez nakadawat og P2,000.
Sa laing bahin, ang tandem nilang Teresito Gonzales ug Reyden Colina maoy nidominar sa classified doubles human gipilde ang tandem nilang Alvin Villa ug Jonathan Rubi, samtang ang tandem nilang Jhunryl Cañete ug Christopher Daclan mao sab ang nanghawod sa open youth doubles human gipukan ang tandem nilang Renald Garrido ug Arnel Baltonado. – BANAT NEWS