Sukmagay sa Countrymall

CEBU, Philippines - Usa ka dosenang paresan sa amateur boxers ang magbinukbukay sa year opener sa Summit Natural Drinking Water Amateur Boxing Tournament karong gabii diha sa Gaisano Countrymall carpark sa Banilad, ning siyudad.

Sa gihapon moladlad na usab ang mga batan-ong boksidor gikan sa Philippine-Australian Boxing Club (PABC), Flores Boxing Club, Sta. Cruz Stable sa Talisay, Cabancalan boxers ug mga bisitang boksidor gikan sa Cagayan de Oro, Butuan ug Aklan.

Ang PABC nga maoy nangharos sa katapusang leg sa 2009 edition sa Summit Amateur Boxing Tourney, moparada sa ilang mga boksidor nga naglakip nila ni Richard Rama, Rason Tarona ug Jason Tuñacao.

Namugna pinaagi sa hiniusang puwersa sa Summer Drinking Water ug ALA Boxing Club and Fitness gym, ang maong torneyo pagahimuon makaduha matag buwan. – BANAT NEWS