Honda Underbone Circuit Racing karon nang Domingo

CEBU, Philippines - Nahaon na ang tanan alang sa Honda Motorworld Underbone Circuit Racing karong Domingo diha sa Kartzone sa Panagdait sa Brgy.Mabolo, ning siyudad.

Ang maong lumba nga libre sa tanang professional ug non-professional riders gibahin sa lima ka dibisyon -- 4-Automatic Scooter Class, 110-115 Super Stock Beginners Class, 125 Super Stock beginners class, 110-115 Novice Open Class ug 125 Novice Open.

Hinuon, giklaro ni Jose Daniel Borromeo, ang general manager sa Honda Motorworld, nga bugtong mga motorsiklo lang sa Honda ang mahimong makaapil sa lumba.

Sa press conference kagahapon didto sa Kartzone, si   Borromeo nagkanayon nga ang lumba mao lang ang pasiuna sa lima ka legs nga mahitabo ning tuiga ug sama sa uban pang leg races, aduna usay over-all champion nga koronahan inig human sa tuig.

Sa iyang bahin, si Jong Uy sa Racing line TV, nagkanayon nga lakip sa mga mosalmot sa lumba mao ang mga top riders sa Honda Motorworld team, Honda Binos Team, Power Cycle Team sa Danao ug mga bisitang riders gikan sa Dumaguete ug Davao.

Ang makampiyon sa 125 novice open,100 ug 115 Novice Open mobulsa og P5,000, samtang ang 125 Beginners Super Stock, 110-115 Beginners Super Stock ug 4-Automatic Scooter class makadawat og P2,500.

Niadtong interesadong mosalmot, ang registration himuon atol sa adlaw sa lumba diha sa Kartzone. – BANAT NEWS