Arenas gisuspenso sa NBA, nagdala'g armas

CEBU, Philippines - Gipahibalo sa NBA nga gipahamtangan na og indefinite suspension ang point guard sa Washington Wizards nga si Gilbert Arenas ug walay madawat nga suweldo kalabot sa nahitabong kagubot niadtong Disyembre 21 didto sa ilang korte sa Verizon Center dihang nasakpan kini nga nagtago'g upat ka armas sa iyang locker.

Adunay dakung posibilidad nga taktakon na gyud sa NBA si Arenas ug dili na siya tugotan nga makaduwa pag-usab sa maong liga.

Matod pa ni Arenas nga komedya lang ang iyang pagdala’g armas human sila magkalalis sa iyang teammate nga si Javaris Crittenton samtang nagsakay sila og abyon niadtong Disyembre 19.

 Matud ni NBA commissioner David Stern nga gusto unta siyang mohuwat sa resulta sa imbestigasyon sa wala pa mopakanaog sa iyang silot sama sa gihimo sa NBA sa mga kaso nga susama niini sa milabay’ng katuigan, apan nausab ang iyang huna-huna tungod sa ngil-ad nga batasan nga gipakita ning pipila ka adlaw.     

Ang maong hitabo naghatag og posibilidad nga taktakon na sa NBA si Arenas ug ang mas ngil-ad niini, dili na kinahanglan mobayad ang Wizards sa nahabiling $111 milyones sa iyang kontrata nga gipirmahan niadtong 2008. Si Arenas aduna pa untay nahabiling upat ka tuig uban sa Wizards.  - Gabby G. Malagar gikan sa NBA.com