CEBU, Philippines - Sa pagbukas sa bag-ong tuig, gilihian dayon og daog si JV Araneta pinaagi sa pagsakmit sa kampiyonato sa Cebu Cycling Weekly Race niadtong miaging adlaw diha sa North Reclamation Area sa dakbayan sa Mandaue.
Si Araneta, usa ka doctor ug sports columnist sa The Freeman, igsuong mantalaan sa Banat News, mipukan ni Nanie Quijano alang sa unang dapit sa C2 class.
Sa maong kadaugan, nahimong usa sa mga lig-ong contender si Araneta sa nagsingabot nga Cebu Recycle-Luzvimin Cycling Series karong Enero 23 didto sa Toledo City.
Mitungtong sa ikatulong dapit si Tata Codina, samtang sila si Hyde Esmalin ug Tyre Lambo mao ang mipahiluna sa ikaupat ug ikalima nga dapit.
Sa class B, si Ricky Ermitanio maoy misakiyo sa titulo, si Nilo Barbalose mao ang miangkon sa ikaduhang dapit, samtang sila si Art Lambo ug Ronald Alconera maoy mi-okupar sa ikatulo ug ikaupat nga dapit. – BANAT NEWS