Kalbaryo nilang Simon ug Mary Grace

CEBU, Philippines - Masukod na ang abilidad sa giilang hari ug reyna sa karsada dinhi sa Sugbu nga sila si Simon Losiaboi ug Mary Grace de los Santos sa pagsikad sa Cebu City Marathon karong Enero 10 diha sa Asiatown I.T. Park sa Brgy. Lahug, ning siyudad.

Ang Kenyan nga si Losiaboi ug ang lumad nga taga-Zamboanga nga si De los Santos pulos walay mga pilde sa tanang lumba nga ilang giapilan dinhi sa Sugbu,

Apan lahi kining maong lumba karon kay uban nila nga magdinaganay sa 42K marathon mao ang laing 500 ka mga dekalibreng runners dinhi ug gawas sa nasud.

Bisan og wala makaangkon og pilde sud sa duha na ka buwan dinhi sa Sugbu, dili gihapon mokompiyansa si Losiaboi tungod kay mao kini ang labing unang higayon nga modagan sa mas taas nga lumba.

Makig-ilog usab ni Losiaboi sa titulo mao ang iyang mga kababayan nga sila si Willy Tanui, David Kipsang ug Kimber Keberes. Modagan usab ang   RP Team members Mendel Lopez, Elmer Paniki, Elmer Sabal ug ang igsuong si Cresenciano Sabal, ang kampiyon sa miaging National Milo Marathon.

Sa iyang bahin, si De los Santos makigtigi na usab sa iyang higpit nga karibal Aileen Tolentino sa Cagayan De Oro City.

Gawas ni Tolentino, babag usab sa dalan sa 22-anyos nga si Delos Santos ang Sugbuanang si Mischelle Gilbuena ug ang Kenyan nga si Susan Chepkwony.

Sa press conference kagahapon diha sa Mooon Café sa The Terraces sa Ayala Center-Cebu, si Sportswriters Association of Cebu (SAC) president John Pages miingon nga gawas sa 42K runners, laing 750 ka runners ang nagpalista sa 21K half-marathon ug kapin sa 2,000 usab ang modagan sa 5K Run.

Matud pa ni Pages nga ang Cebu City Government migahin og P300,000 nga ganting salapi alang sa mga mananaog ning maong lumba nga gipaluyohan sab sa Cebu Executive Runners Club (CERC).  – BANAT NEWS