D. Green nag-una na sa SFAA Sinulog Cup

CEBU, Philippines - Mikulit sa ilang ikatulong daog ang Dark Green team pinaagi sa pagpakgang sa Sugbo Customs Brokerage, 55-53 niadtong Domingo sa nagpadayong Still Fighting Athletics Association (SFAA) Sinulog Cup basketball tournament diha sa CEC covered court sa Dimasalang st., ning dakbayan.

Ang kadaugan sa Dark Green maoy mibugto sa tulo ka sunod-sunod nga daog sa Sugbo Brokers.

Tulo ka players sa Dark Green ang mi-iskor og double figures nga gipangulohan ni Rick Dayondon, kinsa mihipos og 12 puntos, samtang sila si Ernie Batad ug Bobby Emol parehong miamot og 10 puntos.

Si Kenneth Batad mi-iskor sab og 12 puntos alang sa pilderong Sugbo Brokers, gisundan ni Arnold Fernandez nga miamot og 11 puntos.

Sa lain pang duwa, ang SWAN-RTW Dealer ubos sa ilang team captain Ritzel Bamba mibuntog sab sa team ZAON, 75-71, samtang ang TNT Five milubong sa Red team, 58-48 ug ang Yellow team mimakmak sa Warriors alang sa labing una nilang daog sud sa upat ka duwa sa iskor nga 57-50.

Si Bamba mi-iskor og 15 sa fourth period sa kinatibuk-an niyang 27 puntos uban ang pito ka rebounds ug lima ka assists aron pangulohan ang SWAN-RTW. 

 Si John Vizcayno mao sab ang nangulo sa ZAON nga mibugha og 17 puntos, samtang si Dodong Edera mitampo og 12 puntos.

Si Jaime Rodriguez mi-iskor og 13 puntos alang sa TNT, samtang si Jerome Radaza adunay 17 puntos alang sa Yellow.

 PUNTOS MATAG USA

Dark Green (55) - Dayondon 12, E. Batad 10, Emol 10, Vanguardia 5, Rexdo 4, Torrevillas 3, Estrada 3, Abonitalla 2, Navarro 2, Romariz 2, Pareja 2

Sugbo (53) - K. Batad 13, Fernandez 11, Dinela 10, N. Romariz 7, Tan 6, Morre 3, Y. Bongon 2, Calderon 2    (BANATNEWS)