Pinas magho-host ng 2010 Asian Continental chessfest

MANILA, Philippines - Sa hangad na maipagpatuloy ang produktibong taong 2009, iho-host ng National Chess Federation of the Philippines (NCFP) ang hindi bababa sa dalawang major international chess tournaments sa Subic sa papasok na taong 2010.

Ayon kay  NCFP  president/chairman Prospero “Butch” Pichay  magiging punong abala ang bansa sa 2010 Asian Continental Individual men’s and women’s  championships sa April 20-30 at ang  ASEAN  age-group  chess  tournament sa June 4-13 na kapwa idaraos sa Subic  Exhibition and Convention  Center.

Hindi bababa sa US$55,000 cash  prizes ang nakataya sa Asian  Individual Championships-- US$40,000 sa men’s division at US$15,000 sa women’s category.

Ang tatanghaling kampeon sa men's division ang mag-uuwi ng top prize na US$6,000.

 “The year 2009 was a very good  year for Philippine chess, especially  with  GM Wesley So   earning a  lot of  respect  from the international community,” ani Pichay.

“But  we believe  the coming  year could  even  be  bigger with the country again hosting the Asian  Individual Chess  Championships  and  the ASEAN age-group chess   tournament,” dagdag pa ni  Pichay, na plano ring mag-host ng   hindi bababa sa limang international upang mabigyan ang mga Pinoy chessers ng kinakailangang exposure.

Inaasahan ni Pichay na lalahok ang mga top players mula sa buong Asia sa nine-round competition na kinukunsiderang pinakamalaking chess competition sa rehiyon.

 Bukod sa malaking premyo na nakataya sa  2010 Asian Championships, nakataya rin ang apat na slot para sa 2011 World  Chess Cup na nakatakda sa Khanty-Mansiysk, Russia.

Ito ang ikatlong pagkakataon sa apat na taon na ang bansa ay magho-host ng Asian Individual Championships sa ilalim ng liderato ni Pichay at secretary-general at Tagaytay City Mayor Abraham 'Bambol' Tolentino.