Prince away na sab dinhi sa Sugbu
CEBU, Philippines - Subli na sab nga mopakita'g aksiyon dinhi sa Sugbu si Cary 'The Prince' Bullos aron harungon si Arie Zarco sa Benibe MMA Manila sa usa sa tulo ka main events sa COLT 45 URCC Cebu 5-Deliverance karong Enero 15 diha sa Cebu International Convention Center (CICC) sa dakbayan sa Mandaue.
Taud-taod na nga wala moduwa si Bullos tungod sa kakulian sa panglawas. Katapusang nakaaway si Bullos batok ni Lino 'The Terminator' Tagacay atol sa URCC Cebu 3.
Sa iyang bahin, si Zarco, nangita sab og kaluwasan human mapilde ni Cebu-based Persian Warrior, Sabab Fadai pinaagi sa URCC 15-Onslaught sa Manila.
Ang laing duha ka main event naglakip ni Engi 'The Destroyer' Piloto sa Cebu batok ni Richie Redman sa Iloilo ug Tom 'The Hawk' Woodin sa UK batok ni Razi Jabbari sa Iran.
Sa dili pa ang ilang sangka, magbinukbukay una ang pito ang supporting bouts nga naglakip sa MMA artists gikan sa Cebu Bacolod, Iloilo ug Bohol.
Ang mga tiket nagkantidad og P1,000 (VIP), P500 (Upper Box) ug P300 (General Admission).
Mapalit kini diha sa LOFT Restaurant & Lounge (Asiatown IT Park) ug BISTRO Ecila (The Terraces, Ayala Center Cebu).
Alang sa dugang mga kasayoran, mahimong motawag sa 238-0532. – BANAT NEWS
- Latest
- Trending
