CEBU, Philippines - Nag-una sa tagsa-tagsa nila ka dibisyon ang taga-Davao nga si Elmer Bartolo ug ang garbo sa University of Southern Philippines-Foundation (USPF) Mary Joy Tabal sa nagmalampusong 2nd Talisay Run 12K Year-End Chase kagahapon didto sa Talisay City Hall grounds.
Niining higayuna, nangharus si Bartolo sa 12K men’s open human wala makapakita og aksiyon ang Kenyan nga si Simon Losiaboi ug Mendel Lopez.
Si Bartolo mitapos sa lumba sa oras nga 41 minutos ug 6.87 segundos, gisundan nila ni Ian Bernido sa oras nga 41:11.74 ug Riez Enriquez sa oras nga 42:04.55 alang sa ikaduha ug ikatulong dapit.
Sa pikas bahin, si Tabal misutoy ngadto sa finish line sa oras nga 51 minutos ug 53.07 segundos, samtang sila si Joeyry Lee (53:13.9) ug Emily Chiongbian (55:11.64) kinsa maoy second ug third placer sa 12K women’s open.
Laing produkto sa USPF nga si Joel Delposo maoy naghari sa 5K men’s race uban nila ni Reprinel Banzon ug Aubrey Ariola isip runner-ups, samtang si Merlita Arias-Dunkin, Mary Ann Alforque ug Lorilyn Abucay maoy top three finishers sa 5K women’s class.
Sa media category, ang manag-asawa nga sila si Max ug Marlene Limpag maoy nangharus sa 5K run, samtang sila si Prince Joey Lee ug Jhean Andrin maoy midaog sa 3K boys and girls class.
Ang maong lumba gipasiugdahan sa Kabangis Runners, Talisay City Sports Commission ug Task Force Alpha. - Lemuel P. Maglinte (BANAT NEWS)