Berberio, Carter Runners of the Year
CEBU, Philippines - Bisan sa kadaghan sa runners nga misulod karon sa marathon dinhi sa Sugbu, milampos gihapon ang mga Sugbuanon nga sila si Charlie Berberio ug Madelyn Carter pagsakmit sa “Runners of the Year” sa 2009 Run For Sight Series niadtong Domingo diha sa Cebu Doctor’s University, NRA.
Si Berberio nga maoy gibayaw nga "Male Runner of the Year" ug si Carter isip "Female Runner of the Year," nakadawat og Nokia cellphone ug DVD player isip ganti gikan ni Dr. Yong Larrazabal, ang organizer sa maong kalihukan.
Gawas sa pasidungog, midaog usab si Carter sa final leg sa 10K women’s run sa oras nga 41:23.00, samtang si Berberio nga mitapos sa ikatulong dapit niadtong Domingo, mao gihapon ang mipatigbabaw tungod sa dakung puntos nga iyang natigom sa miaging mga legs.
Sa laing bahin, si Robert Daang maoy mihari sa 5K men’s division sa oras nga 17:52.37, samtang si Llerin Andreama maoy reyna sa 5K women’s class sa oras nga 34:01.14. (BANAT NEWS)
- Latest
- Trending
