Casimero bag-ong WBO Interim champion

CEBU, Philippines - Milampos ang produkto sa Omega Boxing Stable nga si Johnriel Casimero sa pagsakmit sa WBO Interim Light Flyweight title dihang iyang gipahunong ang Colombian nga si Cesar Canchila sa ilang sangka kagahapon didto sa Estadio Nacional sa Managua, Nicaragua.

Bisan paman og nailhan nga usa ka knock-out artist ang iyang kontra, mas mipatigbabaw ang kaisug sa lumad nga taga-Leyte dihang iyang gilumsan sa iyang mga makusug nga kinumo ang Colombian.

Ang reigning WBO Asia-Pacific titlist nga si Casimero mipatumba ni Canchila sa ikatulo, ikaunom, ikasiyam ug ika-11 round sa wala pa gihunong sa referee ang away pabor ngadto sa Pinoy.

Sa iyang bahin, si WBO Vice-President Leon Panoncilio midayeg usab sa gipakitang katakus ni Casimero kinsa usa na usab karon sa mga boksidor nga atangan sa tibuok nasud nga mohimo og iyang ngalan sa kalibutan sa boxing.

Si Casimero kinsa maoy rank No.4 sa WBO, pabiling walay pilde sa 14 niya ka away uban ang walo ka knock-out, samtang si Canchila kinsa rank No.2 sa WBO, minaug ngadto sa 28-3, 22KOs, win-loss record. - Lemuel P. Maglinte gikan sa Philboxing (BANAT NEWS)