MANILA, Philippines - Nangibabaw ang defending champion Talk N Text sa mahigpit na labanan kontra sa Purefoods, 101-98 upang masolo ang ikatlong puwesto sa KFC PBA Philippine Cup na dumako sa Xavier University gym sa Cagayan de Oro City kagabi.
Umiskor si Mac Mac Cardona ng jumper upang ilagay sa trangko ang Tropang Texter, 99-98, 45 segundo ang nalalabing oras sa laro.
Nasira ang diskarte ni James Yap, ang top scorer ng Purefoods na nagsumite ng 28-points, nang maagawan ito at tawagan ng loose ball foul laban kay Jimmy Alapag na kanyang inireklamo kaya pinatawan pa ito ng technical foul ngunit para sa tatlong free-throws ni Alapag ngunit wala siyang naipasok sa mga ito.
Gayunpaman walang nangyari sa krusyal na posesyon ng Purefoods nang mabigo silang makaiskor at nakakuha ng foul si Ali Peek kay Kerby Raymundo.
Parehong ipinasok ito ni Peek para sa panigurong 101-98 kalamangan, 2.3 segundo ang natirang oras sa huling posesyon ng Purefoods na hindi nila nagamit matapos ang isang turnover sa inbound passing error.
Ito ang ikatlong sunod na panalo ng Talk N Text at ika-siyam sa 13-laro na nasa likod ng leader na Alaska (10-1) at pumapangalawang San Miguel (11-3) habang nalaglag sa ikalimang puwesto ang Purefoods (8-6 sa likod ng Ginebra (8-5).
Samantala hangad ng Coca-Cola na makabingwit ng malaking isda matapos makasungkit na malaking tagumpay na nag-ahon sa kanila mula sa walong sunod na talo
Sasagupain ng Tigers ang Alaska sa alas-4:00 ng hapon sa pagpapatuloy ng KFC PBA Philippine Cup na magpapatuloy sa Araneta Coliseum.
Sa ikalawang laro maghaharap naman ang sister teams na San Miguel at Barangay Ginebra sa alas-6:30 ng hapon kung saan hangad ng Beermen ang ikatlong sunod na tagumpay. (MBalbuena)