Albaracin, Cañeda magtigi sa ROY award

CEBU, Philippines - Higpit kaayo ang panagkaribal nilang Erwin Albaracin ug Jay-R Cañeda, alang sa titulo nga “Rider of the Year” sa 2nd Mayor Jonas Cortes Underbone Rally Cross Racing 2009 karong Domingo diha sa Cebu Doctors' University (CDU) sa North Reclamation Area, Mandaue City.

"Pulos nakatigom og dakung puntos sila si Albaracin ug Cañeda sa miaging mga leg," matud pa ni Evvolve Marketing operations manager Rico Gonzales sa press conference kagahapon didto sa Family Choice Restaurant sa Gaisano Countrymall.

Mahinungdanon ang lumba karong Domingo ug makita na ang katag kun kinsa sa duha ka riders ang makadawat   sa labing dakung award sa maong torneyo.

Gawas nila ni Albaracin ug Cañete, magpinuhalay usab ang laing 100 riders gikan sa Bohol, Dipolog ug Dumaguete.

Ganting salapi, tropeyo ug freebies ang nagpaabot sa mga mogawas nga kampiyon sa expert, novice ug beginners categories. Ang kampiyon sa expert category mobulsa og P10,000, ang second placer makadawat og P5,000 ug ang third placer makaangkon og P3,000.

Ang top three finishers sa novice division makaangkon og P5,000, P3,000 ug P2,000 ug ang top three sa beginners class makadawat og P3,000, P2,000, ug P1,000.

Ang torneyo hiniusang proyekto sa PTT Philippines, Inc. ug Evvolve Marketing Corp. uban sa suporta sa kagamhanan sa dakbayan sa Mandaue ubos sa liderato ni Mayor Jonas Cortez.

Sa pikas bahin, si PSR president ug race organizer nga si Jonas Adlawan mipahibalo usab sa nagsingabot nga 1st Mayor Tomas Osmeña National Motocross Championship karong Disyembre 27 diha

sa South Road Properties (SRP).

Sumala pa ni Adlawan mabulokon ug puno sa aksiyon lumba tungod sa pag-apil sa mga gikan sa Luzon, Visayas ug Mindanao.  – BANAT NEWS