MLKP-Cebu Niños laraw mosud sa PBA

CEBU, Philippines - Gihangop ni M. Lhullier Kwarta Padala-Cebu Niños team owner Michel J. Lhuillier ang posibilidad nga paapilon ang iyang koponan sa labing dakung liga sa nasud -- Philippine Basketball Association (PBA) isip guest team sunod season.

Human sa makasaysayanong kalampusan sa iyang koponan sa miaging Liga Pilipinas Conference 3 diin nasakmit nila ang kampiyonato nga walay pilde, si Lhuillier misaysay nga nakadawat siya og daghang imbitasyon gikan sa mga kadagkuan sa PBA aron moambak sa liga.

Hinuon, si Lhuillier nagkanayon nga ila pang tun-an ang mga posibilidad sa maong lakang uban sa iyang sinaligang head coach Raul 'Yayoy' Alcoseba, kinsa iyang gitahasan nga maoy motan-aw sa kaayohan nga ilang makuha sa pagsalmot nila sa PBA.

Matud pa ni Alcoseba nga adunay posibilidad nga mosalmot sila sa PBA tungod kay nahutdan na sila sa mga kontra ug bugtong nilang konsiderasyon mao ang dakung galastuhon.

 “That will be a challenge for us pero kinahanglan pa gyud natong tan-awon ang figures kay mura’g daku gyud ni’g gasto,” matud pa ni Alcoseba atol sa ilang victory/ Christmas party sa miaging gabii

diha sa Yayoy’s Grills and Resto

Bar.

Sa pagka karon gusto lang unang tagamtamon ni Lhuillier ang kalampusan sa Cebu Niños, kinsa mipakita sa ilang pagka dominante pinaagi sa pagsakmit sa unang titulo sa Liga Pilipinas, gisundan sa 21 game- sweep aron makuha ang titulo sa Liga Pilipinas Season 3.

Sa laing bahin, lakip sa mga mitambong sa maong selebrasyon mao sila si Cebu Mayor Tomas Osmeña ug Vice Mayor Mike Rama.

Si Osmeña mapasalamaton ug midayeg sa Niños, kinsa maoy naghatag og dungog sa siyudad sa natad sa basketbol. – BANAT NEWS