Liloan, Minglanilla 2-0 na's GUV Cup
CEBU, Philippines - Duha ka lig-ong koponan --, Liloan ug Minglanilla ang mikadlit sa ilang ikaduhang sunod-sunod nga daog sa men's division sa municipal cluster quarterfinals sa 5th Governor Gwen Garcia Unity Volleyball (GUV) Cup sa miaging adlaw diha sa Cebu International Convention Center (CICC) grounds sa Mandaue City.
Ang Liloan ni coach Ondo Mosqueda mimakmak sa Daanbantayan, 25-19, 25-11 aron temporaryong maghari sa bracket-A bitbit ang 2-0 nga baraha.
Miagak sa Liloan ngadto sa kadaugan mao sila si Jade Becaldo sa University of the Visayas (UV), Jackie Yrog-irog sa University of San Jose-Recoletos (USJ-R) ug kanhi University of Southern Philippines Foundation (USPF) stalwarts Angellan Visco, Clifford Café, Maynarn Alijandrino ug James Ryan Rivera.
Sa bracket -B, ang Minglanilla milatigo sa Sta. Fe, 25-22, 25-21 aron magpabiling walay pilde sud sa duha ka duwa. Ang Minglanilla gimaneho ni USJ-R asst. coach Dave Areza, Abellana National School Kareem Datig ug USJ-R spiker Leoniel Sanchez.
Sa laing bahin, ang Compostela ug Tuburan mikulit sab og daog sa managlahing mga paagi. Ang Compostela wala kaayo mahasol pagposte og daog batok sa Carmen, 25-13, 25-14, samtang ang Tuburan nangayo pa og tulo ka sets sa wala pa nila buntoga ang Dalaguete, 23-25, 25-16, 25-22.
Sa pikas bahin, ang Catmon ni coach Vilma Veloso milansang sa ilang ikatulong sunod-sunod nga daog pinaagi sa default batok sa Daanbantayan, samtang ang Compostela miinat sa ilang baraha ngadto sa 3-1 human nila gipilde ang Dalaguete, 25-16, 24-26, 25-21.
Sa laing duwa, ang Sta. Fe milampurnas sa Sogod, 25-23, 25-23, samtang ang Barili mipulbos sa Tuburan, 25-21, 25-15. – BANAT NEWS
- Latest
- Trending
