MANILA, Philippines - Naglabas ng mahusay na laro sina Rapo Garcia at American student na si Williams Porter sa endgame upang dalhin ang Technological Institute of the Philipines Engineers sa 96-83 pananaig kontra sa Colegio Sta. Monica Cougars kahapon sa 17th National Capital Region Athletic Association (NCRAA) men’s basketball tournament.
Ginamitan ng Engineers ng matibay na depensa sa loob ang Cougars upang supilin ang ilang ulit na tangkang pagbangon nito at iposte ang kanilang ikapitong panalo matapos ang walong laro sa sarili nilang court sa TIP-Casal gymnasium sa Quiapo, Manila.
Tumapos lamang si Garcia, kasalukuyang nagpapagaling mula sa tinamong hiwa sa kaliwang kilay sa nakaraang laban nila kontra sa Olivarez College Sea Lions nitong nakaraang linggo, ng 5 puntos lamang kabilang ang krusyal na drive mula sa assists ni Andrew Arcadio may 1:43 ang nalalabi sa laro.
Ang basket na iyon ni Garcia ang naghatid sa Engineers ng 84-81 pangunguna at lumapit sa bentaheng twice-to-beat sa kanilang pakikipaglaban sa pumapangalawang Rizal Technological University Blue Thunder na may taglay na 6-1 win-loss slate.
Nauna rito, nagsalpak si Imelda Paz ng 23 puntos upang igiya ang Rizal Technological University Lady Thunder sa 83-44 paglampaso sa Emilio Aguinaldo College-Dasmariñas sa women’s side sa cagefest na ito na suportado ng Mikasa at Molten Balls. (Sarie Nerine Francisco)