CEBU, Philippines - Giluwas ni George Ermac ang Alelu’s Friends gikan sa mga kamot sa Cambiohan, 91-87 aron moabante ngadto sa finals sa Nangka Christmas Basketball Tournament didto sa Brgy. Nangka sa Consolacion.
Si Ermac mihipos og 21 puntos lakip na ang kuwatro puntos ug usa ka crucial steal sa katapusang dos minutos sa duwa aron luwason sa kakuyaw ang Alelu’s Friends.
Laing miwadwad sa Alelu’s Friends mao si Dars Medina, kinsa mikabkab og 18 puntos nga tanan pulos gikan sa three-point area nga maoy miduslit sa opensiba sa iyang koponan sa first period, 21-18.
Si Lemar Dahil miabuno og 14 puntos, samtang si Lemuel Malagar midugang og 10 puntos alang sa Alelu’s Friends.
Ang Cambiohan gipangulohan ni Warren Dinampog sa iyang 23 puntos, gisundan ni Ilong Mejares nga adunay 14 puntos.
Ang maong torneyo gisuportahan sa barangay council sa Nangka ubos sa liderato ni Brgy. Capt. Rey Cataluña uban ni konsehal Neil Congson nga maoy commissioner.
PUNTOS MATAG USA
Alelu’s Friends (91) - Ermac 21, Medida 18, Dahil 14, Malagar 10, Valle 8, Dumaguit 8, Lavarez 6, Gonzaga 6, Somosot 4, Bio 2
Cambiohan (87) - Dinapog 23, Mejares 14, Budz 12, Eliott 10, Easron 10, George 10, Gibson 8 (BANATNEWS)