CEBU, Philippines - Gibulhotan ni Mary Grace Delos Santos ang Cebuana nga si Leizl Lumindas-Gitaruelas aron masakmit ang titulo sa 5K women's division sa University of Cebu- Teachers Association (UC-TA) Fun Run kagahapon diha sa UC Mambaling, ning siyudad.
Si Delos Santos pabiling wala'y pilde sa tanang lumba nga iyang gisalmutan dinhi sa Sugbu nga maoy naghatag kaniya sa titulo nga "Marathon Queen of Cebu".
Ang taga Zamboanga nga si Delos Santos mitapos sa lumba sa oras nga 20:37.150, samtang ang Mt.Kinabalu Climbathon sixth placer nga si Gitaruelas mikutlo og oras nga 21:56.520 alang sa ikaduhang luna. Si Merlyn Alin maoy third placer sa oras nga 25:35.250.
Sa pikas bahin, pakyas ang Cebuano nga si Mendel Lopez sa paglabni sa kampiyonato sa 5K men's division dihang gipukan na usab siya sa Kenyan Missionary nga si Simon Losiaboi.
Nakabsan sa kusog si Lopez kinsa mirehistro og oras nga 17:01.240, aron gukdon si Losiaboi kinsa misutoy sa oras nga 16:37.710. Nagsunod kanila sa ikatulong dapit ang garbo sa University of Southern Philippines Foundation (USPF) nga si Joel Delposo kinsa adunay oras nga 17:10.830. - Lemuel P. Maglinte (BANAT NEWS)