RP Team Pabiling Masaligon

CEBU, Philippines - Buhi gihapon ang paglaum sa RP Team nga makakuha og pwesto sa top three sa standing bisan paman sa sunod-sunod nilang kapakyasan sa nagpadayong 25th Southeast Asian Games didto sa Laos.

Ang chef-de-mission sa RP Team nga si Mario Tanchangco nagkanayon nga wala gihapon kawad-i sa kadasig ang mga atleta ug padayon gihapon silang nagtinguha nga muhatod og bulawang medalya alang sa nasud.

Hinuon, si Tanchangco miangkon nga lisud gyud ang mga nakontra sa mga atletang Pinoy ilabi na sa natad sa athletics, swimming, billiards, boxing, tennis, wushu ug jodu.

Sumala pa ni Tanchangco nga nasagmuyo sila sa pagkapilde sa mga pambato nga sila si Efren "Bata" Reyes and Francisco "Django" Bustamante sa billiards, Asian Games boxing champion Joan Tipon, Ryan Arabejo sa swimming, taekwondo jin Japoy Lizardo ug Rolando Lagman sa karateka.

Ang Pilipinas nahimutang karon sa ikapitong dapit sa overall medal tally sa ilang walo ka golds, 14 silvers ug 15 bronzes.

Naapsan na sa Thailand ang Vietnam alang sa liderato sa standing, gisundan sa Singapore sa ikatulong dapit , Malaysia, Indonesia ug Laos.

Naghatag nalang karon og paglaum sa RP Team nga musaka pa sa standing mao ang nahibling mga atleta nga moduwa sa wushu, boxing, swimming ug track and fields.

Niadtong Sabado, katapusang mihatud og bulawang medalya sa nasud mao ang mga Fil-Americans nga sila si Cecil Mamiit ug Treat Huey kinsa mipilde sa mga taga-Thailand nga sila si Sonchat ug Sanchai Ratiwatana sa men's team tennis competition didto sa tennis center sa National University. -  BANAT NEWS