CEBU, Philippines - Gipakuratan sa Jonadel’s Inn and Suites dribblers ubos sa pagpangulo ni Roy Lansang aron pagputol sa four-game winning streak sa kanhi nag-una nga RCAF ni team owner Romeo Faunillan human sa ilang 93-88 nga kadaugan kaniadtong Huwebes sa nagpadayong Norvic Abella Cup 2009 Christmas tilt didto sa Labangon hardcourt, ning dakbayan.
Ang RCAF naglabaw og usa ka palito human sa first period, 24-23 lead ug naglabaw og singko puntos, 47- 42 atol sa halftime tungod sa pagtambayayong nilang three-point artist Alwen Tabasa ug gi-abagan ni Jung Wilbur.
Apan hinay-hinay nga mikamang sa unahan ang Jonadel’s ug misakmit sa labaw pinaagi sa paggamit og hugot nga depensa aron mohimog, 26-13 nga rally ug molabaw og otso puntos, 68-60 pagsugod sa fourth period.
Nakontrolar sa Jonadel’s ang duwa gikan sa pagsugod sa fourth quarter ug wala na makahuygo sa ilang opensa ang RCAF tungod sab kay nagsige sila’g kasayop.
Ang kadaugan naghatag sa Jonadel’s og 5-0 nga baraha aron mao nay mag-una hulip sa RCAF.
Si Tinong Ceros maoy nangu sa Jonadel’s sa iyang 24 puntos samtang sila si Wilbur ug Tabasa maoy nangu sa RCAF sa ilang 25 ug 24 puntos, matag usa kanila.
Puntos matag usa:
Jonadel’s (93)— Ceros 24, Cortes 15, R. Lansang 13, Ponteras 10, Caster 10, Dela Cerna 6, Treyes 5, B. Abella 4, J. Tabasa 3, R. Abella 3
RCAF (88)— Wilbur 25, Tabasa 21, Baguia 10, Ortega 8, Tapere 7, Faunillan 4, RJ Tabasa 3, Sabanal 3, Mosqueda 2, Martinez 2, Ebrada 2, Sarucam 1. - Gabby G. Malagar (BANAT NEWS)