Park 'N Go nakatabla vs. UTASSCO

CEBU, Philippines - Pabiling buhi ang Park ‘N Go sa finals human ilang gipukan ang UTASSCO Utility sa iskor, 92-79 sa Game 2 sa ilang best-of-three championship series kaniadtong Sabado sa gabii atol sa nagpadayong Power Forty Christmas League basketball tournament didto sa Inayawan Sports Complex.

Sa sayo pa, giangkon sa Water Market ang ikatulong pwesto human ilang gi-usban ang www.fedguns.ph sa iksor, 92-73.

Wala kapugngi sa UTASSCO si Michael Arias kinsa mibahug og 24 puntos gawas sa iyang pagpunay og lawog ngadto sa iyang mga libreng kauban nga aron sab makaamot sa opensa.

Gani ang Park N Go team owner nga si Romy Rama mi-iskor man og double figures sa iyang 12 puntos samtang sila si Mardy Echavez ug Sammy Atillo mihakot og 18 ug 14 puntos, matag usa.

Si Atty. Flor Yosores maoy nangu sa UTASSCO pinaagi sa iyang 20 puntos apan dili pa kadto igo aron baswaton ang iyang team kinsa napakyas pagkulit og 2-0 sweep.

Laing tulo ka kauban ni Yosores miabuno sab og double figures.

Sa laing bahin, si Vez Eleguin miburak og 24 puntos aron pangulohan ang Water Market ug sila si Edwin Dejacto ug Allan dela Rama, parehong mi-iskor og 20 puntos.

Ang fedguns gipangulohan ni Cogon, Pardo Konsehal Jojo Ibones kinsa mi-iskor og 15 puntos.

Ang Game 3 ipahigayon sa sunod semana ug human sa pagpang-apud-apod sa mga ganti, magsaulog sab ang mga sakop sa Power Forty sa ilang Christmas party didto sa Inayawan Sports Complex.

Puntos matag usa

Unang duwa:

Water Market (92)— Eleguin 24, Dejacto 20, Dela Rama 20, Cayacap 12, Bughao 9, Dacalos 7

Fedguns (73)— Ibones 15, Abadejos 10, Rabadon 10, Javierto 10, Nacario 9, Ramil 8, Mabalcon 7

Ikaduhang Duwa:

Park ‘N Go (92)— Arias 24, Echavez 18, Atillo 14, Rama 12, Dejarme 8, Lalican 8, Ozon 8

UTASSCO (79)— Yosores 20, Escalon 19, Mercado 17, Cabrera 13, Pestaño 6, Abasolo 2, Yu 2. - Gabby G. Malagar (BANAT NEWS)