Catmon unang midaog sa 5th GUV Cup quarterfinals

CEBU, Philippines - Gisugdan sa reigning champions Catmon ang   ilang kampanya sa pagpanalipod sa korona pinaagi sa pagkulit og daog batok sa Minglanilla sa municipal cluster quarterfinals sa 5th Governor Gwen Garcia Unity Volleyball (GUV) Cup kagahapon diha sa Cebu International Convention Center sa dakbayan sa Mandaue.

Ang Catmon ni coach Vilma Veloso mipukan sa Minglanilla sud sa straight sets, 25-13, 25-21.

Wala mag-usik og panahon ang Catmon lady spikers ug mipakita kini sa ilang makalisang nga atake ug solidong depensa aron dag-on ang first set, 25-13.

Nakasinati og kalisud ang Catmon sa second set, apan nakahimo gihapon kini sa pagdaog.

Sa laing bahin, ang Liloan ug Barili nakigduyog sa kadaugan sa Catmon.

Gipahilom sa Liloan ang Sta. Fe, 25-13, 25-18, samtang ang Barili miagi pa'g tulo ka sets una nila maangkon ang kadaugan batok sa Boljoon, 25-17, 21-25, 25-16.

Sa men's division, ang Liloan   mao sab ang mipatigbabaw batok sa Dumanjug, 25-10, 25-15.

Si RP Team member Jonrey Sasing ug kanhi USPF stalwarts Angellan Visoc, Clifford Café, Maynard Alijandrino ug James Ryan Rivera maoy nangulo sa kadaugan sa Liloan ni coach Ondo Mosqueda.

Ning pagsuwat, nagduwa pa ang laing koponan sa men's division sa quarterfinals.

Ang top four teams sa matag kategoriya awtomatik moabante sa semifinals sunod Sabado uban sa city cluster semifinalists.

Ang Mandaue ug Talisay maoy nag-una sa city cluster sa men's ug women's divisions.

Magsangka sa city clusters mao ang Mandaue batok Carcar, samtang ang second-seeded Talisay moharong sa Danao sa women's division. Sa men's division, ang Talisay makigsangka sa Carcar ug ang Mandaue mobatok sa Toledo.

Ang kampiyonato himuon karong Disyembre 20 sa ala-1 sa hapon diha gihapon sa CICC. (BANATNEWS)